¿Que din os rumorosos,
na costa verdecente,
ó raio transparente
do plácido luar...?
¿Que din as altas copas
de escuro arume arpado
co seu ben compasado,
monótono fungar...?
Do teu verdor cinguido
e de benignos astros,
confín dos verdes castros
e valeroso chan,
non des a esquecemento
da inxuria o rudo encono;
desperta do teu sono
fogar de Breogán.
Os bos e xenerosos
a nosa voz entenden,
e con arroubo atenden
o noso rouco son;
mais só os ignorantes
e feridos e duros,
imbéciles e escuros,
non nos entenden, non.
Os tempos son chegados
dos bardos das idades,
que as nosas vaguedades
cumprida fin terán;
pois, donde quer, xigante
a nosa voz pregoa
a redenzón da boa
nazón de Breogán.
